Һава температурасы түбән булу сәбәпле, чаңгы ярышлары кичектерелә килде. Ниһаять, үткән якшәмбедә Чирмешәнлеләр чаңгыга басты һәм төрле авыл җирлекләреннән килгән 400 кеше катнашында "Лыжня Татарстана - 2014" ярышлары булып узды. Ярышлар яшүсмерләрнең, ирләр һәм хатын кызларның яшь үзенчәлекләренә карап оештырылды. Туймәт авылы җирлегеннән  һәм мәктәп укучылары арасыннан ярышка баручылар һәм катнашучылар буш кайтмадылар. Ирләр ярышында авылдашыбыз Кәримов Рәмил абый - 2 нче урында, гаиләләр арасындагы ярышта Әүмәтҗановлар шулай ук 2 нче урында булса, укучы егетләребез - Әхмәтҗанов Айнур, Мортазин Илнар, Кәримов Азатлар - иң оста һәм актив чаңгычылар исемлегендә беренчеләр. Чын күңелдән котлыйбыз, яңа җиңүләр теләп калабыз. Туймәт авылында яшәүче башка яшь гаиләләрне дә актив, сәламәт тормыш рәвеше алып барырга, спортны яратырга, авылның данын күтәрү өчен шундый массакүләм ярышларда киләчәктә катнашырга чакырабыз.