Кешелекне, инсаниятне мәхәббәт, ярату яшәтә! Мәхәббәт булганда гына тормыш матур, күңелле. Ә нәрсә соң ул мәхәббәт? Гашыйклар көненең килеп чыгыш турында тарих ни сөйли? Ни өчен бу бәйрәм яшьләр арасында соңгы елларда популярлашып китте? Мөселман буларак, бу көнне без ничек бер-беребезне тәбрикли алабыз?   

14 нче февраль - Гашыйклар көне уңаеннан 9 нчы сыйныф җитәкчесе Гыйниятуллина Роза Габдрәшит кызы һәм укучылар үткәргән ачык сыйныф сәгатендә әнә шул сорауларга җавап эзләнде.

7, 8, 9 нчысыйныф укучылары бик актив булдылар. Төрле фикерләр арасыннан дөрес, кулай дигәннәрен сайлый бардык. Егетләрнең никадәр матур, ягымлы сүзләр белүен тикшердек, ә кызларның  байлыкка мөнәсәбәтләрен анализладык. Авылдаш шагыйребез Габделхак Галимовның да, үлемсез шагыйрьләребез Фәнис  Яруллин, Шәүкәт Галиев һәм башкаларның мәхәббәт темасына язылган шигырьләрен укучылар сөйләвендә тыңлап хозурландык, бик күп сораулар буенча фикерләр алыштык, мәхәббәт хакында җырлар тыңлап кинәндек.

Мәхәббәт - мәңгелек. Гомерләребез Мәхәббәт дигән изге хисне татымый үтмәсен иде, сөеп-сөелеп яшәргә язсын дигән фикер-теләк белән күтәренке рухта таралыштык.