2 нче февраль "Россиянең хәрби даны көне" буларак билгеләп үтелә. Моннан 71 ел элек, 1943 нче елда 200 көнгә сузылган, тарихка иң канкойгыч, дәһшәтле көннәр буларак кереп калган Сталинград бәрелешендә совет солдатлары зур җиңү яулыйлар. Стратегик яктан әһәмиятле булган шәһәр тулысынча азат ителә.  Сталинградта немец гаскәрләрен җитәкләгән фельдмаршал Ф.Паулюс пленга алына. Әлеге бәрелеш Икенче бөтендөнья сугышы барышында иң эре коры җир бәрелеше буларак тарихка кереп кала. Шәһәр оборонасын тотканда 700 меңнән артык совет солдаты һәм офицеры үлә, яралана. 

Бүгенгесе көндә Волгоград шәһәрендә күп кенә тарихи урыннар шушы куркыныч көннәрне искә төшереп торалар. Ә алар арасында иң танылганы - Сталинградны яклаучыларга багышланган   Мамай курганындагы "Ватан-Ана чакыра!" монументы булып тора.