6 - 7 нче сыйныф укучылары әхлак дәресендә мәктәп музеенда экскурсиядә булдылар. Музей җитәкчесе Сафина Р.Г. укучыларны Бөек Ватан сугышында катнашып өчәр якын кешесен югалткан Нуруллиннар: Исмәгыйль, Якуп, Ибраһим уллары, Әхмәтҗановлар: Әхәт, Һади, Мингалим, Әбелгата улларының гаиләләре турында бик тәфсилләп сөйләде. Аларның сугышта күрсәткән батырлыклары турында укучылар көче белән бик күп материал тупланган. Туган якны өйрәнү түгәрәгенә йөрүче балалар әлеге авылдашларының туганнары белән очрашып, аларның истәлекләрен язып алганнар. Яраланган Нуруллин Якуп абыйны тәрбияләп соңгы юлга озатучы Мария апаның хаты да кадерле музей экспонаты. 

Туймәт авылыннан сугышта катнашкан бердәнбер хатын-кыз Гамирова Минзада апаның сугышчан батырлыклары турында да укучылар күп белделәр. Сугышның беренче көненнән азагына кадәр ил азатлыгы өчен көрәшеп Берлинга барып җиткән хатын-кыз ул. Минзада апаны сугышта күрсәткән батырлыклары өчен хөкүмәт бик күп орден-медальләр белән бүләкләгән. 

Укучылар өчен тәрбия сәгате бик кызыклы, файдалы һәм үтемле булды.