Республика күләмендә "Наркотикларсыз тормыш" темасы астында айлык игълан ителде. Наркомания бүгенге көндә чын-чынлап бәлагә әйләнде. Элек аны "көнбатыш чире" дип атасалар, хәзер бу афәт безгә дә килеп җитте. Наркомания, токсикомания кебек авыруларның асылын ачу, укучыларны әлеге куркыныч чирләрдән кисәтү һәм аларда сәламәт яшәү рәвешен формалаштыру максатыннан чыгып Туймәт төп белем мәктәбендә дә чаралар әледән-әле уздырылып тора. Соңгыларына тукталсак, мәктәп күләмендә укучылар белән "Наркомания - афәт ул" темасына әңгәмә, ата-аналар, участок инспекторы Айдар Кәримов, фельдшер Халидә Сәхапова катнашында "Баланың наркотиклар кулланганын ничек белергә?" исеме астында ата-аналар җыелышы узды.

Ата-аналарга да, укытучыларга да балаларның андый билгеләрен күрергә язмасын, наркотик дигән явыз чир барлык балаларны да читләтеп үтсен. Тормышның чын ямен тоеп исән-сау яшәсеннәр иде.