Җәмгыять белеме фәне укучыларны һәрвакыт үзенә җәлеп итеп, тартып тора. Әлеге предметны өйрәнү барышында балалар үзләрен кызыксындырган бик күп кенә сорауларга җавап, катлаулы кебек тоелган мәсьәләләрнең җиңел генә чишелешен табалар, тормышта кирәкле һәм файдалы булган байтак кына күнекмәләргә өйрәнәләр. Җәмгыять белеменнән төрле конкурсларда да балалар теләп катнашалар.

Шундый конкурсларның берсе ноябрь аенда булып узган иде. Бөтенроссия "Сәләтлелекне үстерү үзәге" оештырган бу бәйгедә Туймәт төп белем мәктәбенең 6 - 9 нчы сыйныфлардан 11 укучы катнашты. Шушы көннәрдә конкурс нәтиҗәләре билгеле булды. Мәктәп буенча беренче урында  8 нче сыйныф укучысы Сөләйманова Гөлназ. Катнашучыларның барысы да Сертификат белән бүләкләнделәр. Ә аларны әзерләгән укытучылары Сәүбанова Зилә Мингата кызы конкурста актив эшчәнлек алып баруы өчен Дипломга лаек булды.