18 нче апрельдә Туймәт төп белем мәктәбендә гомуми ата-аналар җыелышы булды. Анда ата-аналар белән бергә 2 - 9 нчы сыйныф укучылары да катнашты. Кунак итеп янгын сүндерү инспекторы Яруллин Фәрит Фәргать улы чакырылды. Ул янгын куркынычсызлыгы турында бик үтемле итеп сөйләде. Аннан соң Фассахова Рәмзия Самат кызы 3 нче сыйныф укучылары белән "Ут дус та, дошман да" темасына ачык сыйныф сәгате күрсәтте. Балалар сорауларга җавап бирделәр, шигырьләр сөйләделәр, утка кагылышлы мәкальләрне дә искә төшерделәр. Шул ук вакытта презентация дә күрсәтелде.

Икенче көн тәртибе буенча сүзне тәрбия эшләре буенча директор урынбасары Сафина Розалия Габбас кызы алды. Ул нәрсә ул коррупция һәм аны ничек кисәтергә дигән сорауларга җавап бирде. Алдагы көн тәртибе буенча "Посмотри в глаза своему ребенку" акциясе кысаларында наркотик, насвай кебек яман нәрсәләрнең зыяны, тәртип бозуларны кисәтү турында сүз барды. Профилактик наркологик медицина күзәтүе уздыруның уңай яклары турында ата-аналарга җиткерелде. "Республикадагы наркоситуация" исемле видеофильм күрсәтелде. Татарстан Республикасының 71 нче законы искә алынды һәм ата-аналар, балалар тагын бер кат кисәтелде. Ышаныч телефоны турында мәгълүмат яңартылды.