Җисемнәре туган илдән еракта калып, исемнәре һәм иҗатлары яңадан үз халкына әйләнеп кайткан күренекле әдипләр арасында татар язучысы, мәгърифәтче, галим Гаяз Исхакый да бар. Г. Исхакыйның иҗаты, бигрәк тә аның эмиграция елларына караган өлеше, эле җитди өйрәнүне таләп итә иде. Бу елны Г. Исхакыйның тууына 135 ел тулу уңаеннан аның иҗатын һәм тормыш юлын яктыртуга багышланган иҗади конкурс игълан ителгән иде.

7 нче апрель көнне Лашман урта мәктәбендә юбилярны искә алу кичәсе узды. Район администрациясе башлыгы Нурхаммәт Нурулла улы Хәмидуллин, Исхакыйның якын туганы, элеккеге район җитәкчебез Минсәгыйт Закир улы Шакиров, мәгариф бүлеге җитәкчесе Хакимов Хаматкамил Шамил улы, инде бик күп еллар Гаяз Исхакыйның тормыш юлы һәм иҗаты белән якыннан кызыксынып томнарын төзүче Лена Гайнанова, тагын бик күп журналистлар, мәктәп директорлары, татар теле һәм әдәбияты укытучылары, укучылар катнашында узган әлеге искә алу кичәсе иҗади яктан тулы, дулкынландыргыч булып күңелләребездә калыр. Кичәдә катнашучыларда тагын бер нәрсә  нык тәэсир калдырды: алар Исхакыйның чын тавышын ишетү бәхетенә ирештеләр. Бәйрәм барышында Лена Гайнанова конкурста катнашучыларга бүләкләрен тапшырды. Туймәт төп мәктәбенең татар теле һәм әдәбияты укытучысы Сафина Кадрия Ильяс кызы татар әдәбияты классигы, җәмәгать эшлеклесе Гаяз Исхакыйның 135 еллыгына багышланган конкурста актив катнашканы өчен әдипнең V томы белән бүләкләнде.