2013 нче елның 5 нче марты 8 нче сыйныф укучылары өчен якты истәлек булып бик озакка калыр, чөнки аларда бүген чын бәйрәм - Гаилә бәйрәме үтте. "Гаилә - җылы учак" темасы астында сыйныф җитәкчесе Гыйниятуллина Роза Габдрәшит кызы оештырган 11 төрле бәйге 10 гаилә-командаларны төрле яклап сынады: алар биеде дә, җырлады да, мәкаль-әйтемнәрне дә искә төшерде, мәгънәсен дә ачыклады, аш-суга осталыклары да тикшерелде, спорт белән ни дәрәҗәдә дуслыклары да ачыкланды, нәфис сүзгә осталыклары да чарланды, гаилә әгъзалары белән мөнәсәбәтләре дә шунда чагылыш тапты. Нәтиҗәдә жюри әгъзалары мәктәп директоры Рәзилә Вәлиәхмәт кызы, педагог оештыручы Кадрия Ильяс кызы белән киңәшеп, түбәндәге номинацияләр билгеләнде. "Иң уңган гаилә" - Гатиннар, "Иң җитез гаилә" - Гыйниятуллиннар, "Иң сөйкемле гаилә" - Кәримовлар, "Тамашачы симпатиясе яулаган гаилә" - Тукаевлар, "Аш-суга оста гаилә" - Сәүбановлар, "Иң тәвәкәл гаилә" - Җиһангировлар, "Спорт сөюче гаилә" - Мортазиннар, "Иң булдыклы гаилә" - Сөләймановлар, "Иң белемле гаилә" - Ногомановлар, "Иң шаян гаилә" - Хәлиуллиннар. Егетләребез тарафыннан, яз гөлләребез - кызларыбызны бәйрәм белән котлап, биргән чәчәкләре чарага тагын да нур өстәде. Әти-әниләргә, бигрәк тә балаларга Гаилә бәйрәме бик ошады. Бәйрәмнән барысы да шат күңел, күтәренке рух белән таралышты.