Мәктәп тормышы шау-шулы мәшәкатьләрдән һәм укулардан гына тормый. Мәктәп тормышында балаларга матур һәм күңелле итеп бәйрәмнәр уздырырга да мөмкинлек бар. Мондый бәйрәмнәрне оештыру, концерт номерларын әзерләү һәм кую безнең мәктәптә тиешле дәрәҗәдә оештырылган, ә менә музыкаль бизәлешне тәэмин итүдә ярыйсы гына сизелерлек кыенлыклар бар иде әлегә кадәр. Зур бәйрәмнәр оештырганда музыкаль аппаратура һәм микрофоннарны без авыл мәдәният йортыннан алып торырга мәҗбүр идек. 

Туймәп төп белем мәктәбенә төрле яклап үзенең олы ярдәмен күрсәтеп торучы үрнәк гаиләбез бар. Ул Кәримовлар гаиләсе. Гаилә башлыгы Рәмил әфәнде һәрвакыт мәктәп коллективының хәлләрен белешеп, бөтен яңалыкларыбыздан хәбәрдар булып яши. Яңа ел бәйрәм тамашасын карарга килгән Рәмил Әхәтович безнең музыкаль бизәлеш буенча берникадәр проблемаларыбыз булуын күрде һәм бу кыенлыкны хәл итү мәсьәләсен үз өстенә алуын әйтте. 

Көннәрдән бер көнне берничә тартма күтәргән Рәмил әфәнде һәм аның гаиләсен күргәч, таң калдык. Алар үз гаиләләре исеменнән мәктәпкә кыйбатлы музыкаль аппаратура һәм микрофоннар алып, мәктәп өчен искиткеч зур бүләк ясадылар. Туймәт төп белем мәктәбе укытучылары һәм укучылары исеменнән Кәримовлар гаиләсенә, аеруча гаилә башлыгы Рәмил Әхәт улына иксез-чиксез рәхмәтләребезне җиткерәбез. Киләчәк тормышыгызда бары тик үңышлар гына көтеп торсын, балаларны бер шатландыруыгыз үзегезгә меңе белән әйләнеп кайтсын.