Математика һәм физика атналыгының соңгы көне килеп җиткәне сизелмичә дә калды. Атна буе конкурс биремнәре, мәсьәләләрнең чишелеш юлларын тикшерү, кемнең тизрәк җавап таба алуы, кемнең иҗади эше югары бәяләнүе хакында фикер алышулар укучыларның теленнән төшмәде. Укытучылары Минһаҗева Гөлзидә һәм Вәлиева Ралия апалары да балаларны кызыксындыру өчен нинди генә бирем, уен, конкурслар уйлап тапмаганнар да, нинди генә сораулар әзерләмәгәннәр. Атналык барышында барлык сыйныф укучылары да фәннәрнең патшабикәсе - математика һәм аңардан үзенең әһәмияте белән бер дә калышмаган физика фәне буенча бик күп мәгълүмат белделәр, үзләре өчен яңа ачышлар ясадылар.

Фән атналыгының йомгаклавы тагын да күңеллерәк булды. Барлык катнашучы укучылар мәктәп администрациясе тарафыннан әзерләнгән бүләкләр белән бүләкләнделәр. Ә шушы атналыкны әзерләгән математика укытучысы Вәлиева Ралия Сабирҗан кызы һәм физика, математика укытучысы Минһаҗева Гөлзидә Рәшит кызына мәктәп администрациясе Мактау грамоталары тапшырды һәм киләчәктә дә хезмәтләрендә уңышлар теләп, рәхмәт белдерде.