Рухы ныклы затлы телебезне,

Юк итәргә ирек бирмәбез!

Татар теле - Татарстан Республикасының дәүләт теле. Без үз телебездә белем алырга, тормышның барлык өлкәләрендә дә үз телебезне кулланырга хокуклыбыз.

Шушы телдә безнең телебез ачылган.Сабый чактан ук телнең кирәклеген аңлаганбыз. Әниләребез, әбиләребез бишек тибрәткәндә көйләгән моңлы җырлардан аның матурлыгын, әкиятләрдән аның гүзәллеген, сихрилеген төшенгәнбез... Ана теле бар кодрәте, матурлыгы,нәфислеге, моңы белән җанга сеңгән, һәм үсә төшкәч, башка телләрнең дә кирәклеген аңларга ярдәм иткән. Без, туган тел сагында торучы укытучылар, балаларга ана теленең кирәклеген, аның бернинди телләр белән дә алыштырып булмый торган тел икәнен, туган тел - нәсел агачының тамыры, аны корытмыйча саклау яшь буынның изге бурычы булуын, сыйныф сәгатьләрендә, ана теле һәм матур әдәбият дәресләләрендә даими сөйләп, аңлатып барабыз. Инде килеп, 21 нче февраль - Халыкара туган тел көне уңаеннан Туймәт мәктәбе шау-гөр килеп торды. Һәр сыйныф әлеге мәртәбәле бәйрәмгә зур тырышлык куеп әзерләнгән. Башлангыч сыйныфлар “Тамчы шоу”интеллектуаль уенын бик кызыклы итеп оештырган иделәр, аннан соң 1 – 9 нчы сыйныфлар катнашында шигъри марафон узды. Бу ике чараны да жюри уңай бәяләде. 5 – 9 нчы сыйнфлар - “ Бетермәгез татар телен!” темасына әдәби сәхифә үткәрделәр.

Әле без бар, телне яклаучылар,

Без яшь буын - милләт сакчысы.

Нахак ягып, кимсетергә теләп,

Туган телебезгә тимәгез!

Ана телебезне - Тукай телен,

Рәнҗетергә ирек бирмәбез!