9 нчы декабрь - Россиядә Ватан каһарманнары көне буларак 2007 нче елдан билгеләп үтелә. Әлеге истәлекле датаның тарихы ерактагы 1769 нчы елның 9 нчы декабренә барып тоташа. Нәкъ шушы көнне императрица Екатерина II Ватан өчен зур батырлыклар кылган кешеләрне бүләкләү өчен Изге Георгий орденын раслаган. Бу көнне истәлекле дата итеп календарьга кертергә карар кылганда Дәүләт Думасы вәкилләре Советлар Союзы Герое, Россия Герое, Дан ордены һәм Изге Георгий ордены кавалерларының якты истәлеген, аларның Ватан алдындагы батырлыкларын мәңгеләштерү максатын  куйдылар.

Ватан өчен гомерләрен кызганмаган, тормышларын куркыныч астына куйган, аның азатлыгы, бәйсезлеге өчен барысын да эшләргә әзер булган кешеләр һәр чорда да булган, бар һәм булачак. Төрле тарихи чорларда дәүләт үзенең каһарманнарын төрле дәрәҗәдәге орден-медальләр, мактаулы исемнәр белән бүләкләсә дә без аларның исемнәрен  белергә, тормыш юлларын өйрәнергә, аларның якты истәлекләрен онытмаска тиешбез.

Бөек Җиңүнең 75 еллыгын каршы алуга әзерлек чаралары кысасында бүген Туймәт төп белем мәктәбендә Ватан каһарманнары көне билгеләп үтелде.  Тарих һәм җәмгыять белеме укытучысы Сәүбанова З.М. 5 - 9 сыйныф укучыларына тематик презентация күрсәтте, истәлекле дата уңаеннан балаларга бик күп файдалы мәгълүмат җиткерде.