Бүген Туймәт төп белем мәктәбендә 6 - 9 нчы сыйныф укучылары өчен Яңа ел кичәсе - зур күләмле бәйрәм булып узды. Педагог-оештыручы Сафина Кадрия Ильяс кызы һәм тәрбия эше буенча директор урынбасары Сафина Розалия Габбас кызы әзерләгән бәйрәм барышында 9 нчы сыйныф укучылары тамашачыларны әкият дөньясына алып керәләр. Убырлы, пәри, шүрәле барыбызга да таныш персонажлар, ләкин бүген Туймәт мәктәбенә кунакка килгәннәре замана шаукымына иярергә өлгергәннәр. Соңгы мода буенча киенгәннәр, ихтыяҗлары да үзгәргән - әкият геройларыбыз урманда гына бикләнеп ятасылары килми, аларның кешеләр арасында күңел ачасылары килә. Җырлы-биюле кичәдә бер генә кеше дә боегып утырмады, уйнады, көлде, биеде, җырлады. Кыш бабай белән Кар кызы һәммә кунакка татлы күчтәнәчләрен тараттылар. Бәйрәмнең икенче өлешендә балалар дискәтүктә кәефләнделәр.