Мәктәп соңгы көннәрдә кырмыска оясы кебек кайный.  Дәресләрдән бушаган бер минутны да сарыф итми балалар, кемдер рәсем ясый, кемдер кәгазь кисә, кайберәүләр ишек төбендәге чыршыны бизәү белән мәшгуль, яңа җыр-бию өйрәнүчеләр дә аз түгел, кыскасы, барысы да Яңа Елны каршы алырга әзерләнә. Мәктәп матур булсын өчен генә эшләми алар аны. Бәйрәм атмосферасын күреп кәефләр күтәрелсен өчен, Кыш Бабайдан бүләк сорарга да онытмас өчен, чирек ахырына да күп калмаганын истә тоту өчен эшләнә бу эшләр. Балалар, әйтерсең, сихри дөньяга аяк басарга җыеналар - Кыш Бабайга хатлар язалар, бер-берсенә матур теләкләр телиләр.  Яңа Ел, Кыш Бабай, бәйрәм тылсымы - без укытучылар өчен дә балачактан истә калган әлеге хәтирәләр күңелләрне тибрәтә, истәлекләрне яңарта. Һәрберебез киләсе Яңа еллардан бары тик яхшылык, күңел һәм гаилә тынычлыгы, бәхет, исәнлек, шатлыклар өмет итә, дөньядагы барлык кешеләргә дә шуны тели.