3 сентябрь – Терроризмга каршы көрәш көне дип билгеләп үтелә. Соңгы еллардагы куркыныч вакыйгаларга һәм саннарга күз салсак күпме терроризм афәтләрен күрәбез. Шуларның берсе  2004 елның 1 сентябрендә Төньяк Осетиянең Беслан шәһәрендә була.  Белем көненә багышланган тантаналы линейка вакытында мәктәпкә террористлар бәреп керә һәм укучылар белән укытучыларны, ата-аналарны тоткынлыкка алалар... Бу вакыйгаларга бүгенге көннәрдә 15 ел булды. Шушы трагедияне искә алу максатыннан 3 сентябрь көнне Туймәт төп белем бирү мәктәбендә тематик ачык класс сәгате үтте. Укучыларга ул вакыттагы вәхшилекне чагылдырылган презентация күрсәтелде. Балалар тагын бер кат шушы ачы хәлләрне күз алларыннан кичерделәр, террористларга каршы ничек көрәшергә кирәклеген белделәр.

Җиһанда сугышлар беркайчан тынмаган. Бүгенге көндә күрше тугандаш Украинада тыныч булмаганын укып, телевизорлардан карап беләбез. Сугышлар һәм канлы вакыйгалар алып килгән күз яшьләрен безгә коярга насыйп булмасын, күгебездә беркайчан да туплар шартламасын, ятимнәрнең саны артмасын.

Бүгенге сөйләшүдән сабак алыйк һәм тыныч тормышыбызның кадерен белергә өйрәник!