Икенче чирек башыннан ук Туймәт мәктәбендә ата-аналар җыелышлары үткәрелә башлады. 4 нче сыйныфта җыелышның темасы "Балаларның һәм ата-аналарның хокуклары һәм бурычлары" дип исемләнгән иде. Сыйныф җитәкчесе Кәримова Наилә Әнәс кызы үзенең докладында белем алуга кагылышлы хокуклар һәм бурычларга киң тукталды. Балаларның белемгә хокукын тормышка ашыру өчен мәктәп эшчәнлегенең генә тиешле дәрәҗәдә оештырылуы җитми, ә әти-әниләрнең өйдә дөрес шартлар тудыруы да бик мөһим. Үз баласына әти-әни салкын карашта булса, өй эше эшләвен, буш вакытны ничек уздыруын контрольдә тотмаса, укытучының мәктәптә куйган көче чын мәгънәсендә юкка чыга. Мондый күңелсез хәлләр килеп чыкмасын өчен Кәримова Наилә профилактик максаттан ата-аналар белән җитди әңгәмә оештырды.

Ә 9 нчы сыйныфның ата-аналарын бөтенләй башка мәсьәләләр борчый. Быелгы уку елында 9-лар чыгарылыш сыйныфы, язын имтихан бирәселәре бар, шуңа да җыелышның темасы: "Алда Дәүләт Йомгаклау имтиханнары. Кайсын сайлыйсы?" - дип исемләнгән иде. Сыйныф җитәкчесе Сафина Кадрия Ильяс кызы әти-әниләрне ел барышында үткәреләчәк мониторинг эшләр графигы, имтихан үткәрү шартлары, укучыларның имтихан вакытындагы булган хокуклары белән, сайлап алу сынауларына кагылышлы сорауларга аңлатма бирде. Шулай ук җыелышта математика укытучысы Вәлиева Ралия белән рус теле укытучысы Гиниятуллина Роза да катнаштылар. Алар үз фәннәренең специфик үзенчәлекләре белән таныштырдылар, әти-әниләрнең сорауларына җавап бирделәр.