Быелгы уку елына 5 нче сыйныфка 5 егет укырга килде. Алар башлангыч сыйныфларда "4"ле һәм "5"ле билгеләренә генә укыдылар, мәктәп тормышында актив эшчәнлек алып баручы укучылар иде. Урта баскычка күчү, яңа укытучыларга өйрәнү, күнегү, социальләшү чорын да алар ярыйсы гына җайлы үткәрделәр. Беренче чиректә алган белемнәрен күрсәтү максатыннан, математика укытучысы Вәлиева Ралия апалары бишләргә әти-әниләре белән берлектә ачык дәрес үткәрде. "Натураль саннарны бүлү" темасы буенча үткән дәрестән балалар гына түгел, кунаклар да бик күп файдалы мәгълүмат алып калдылар. Мәктәп тормышы белән олы буын вәкилләренең дә кызыксынып яшәве шатландыра - бер укучының дәрескә бабасы килгән иде.

Дәрестән соң сыйныф җитәкчесе дә буларак Вәлиева Ралия Сабирҗан кызы ата-аналар җыелышы үткәрде. Анда сыйныфның яраклашу чорын үтүләре, уку-укыту мәсьәләләре каралды.