Дөньяда нинди генә милләт кешеләре юк. Шуңа бәйле һәр милләтнең үз теле, үз гореф-гадәтләре, үз йолалары. Һәр милләт кешесе үз телен хөрмәтли, тирәнтен өйрәнә.

Ә безнең туган телебез – татар теле, зур тарихлы, бай, җырлы, моңлы тел ул. Тел аралашу чарасы гына түгел, ул – тормыш чыганагы, белем чишмәсе.

Мәктәбебезнең башлангыч класс укучылары «21 февраль Халыкара туган тел көне» уңаеннан авыл китапханәсендә оештырылган күргәзмә карарга бардылар. «Туган телем – иркә гөлем» дип исемләнгән бу кичәдә, күргәзмәдән тыш, балалар укытучылар һәм китапханәче белән бергәләп, безне хыялланырга өйрәткән әкиятләр дөньясында, тапкыр һәм зирәк булырга өйрәткән табышмак һәм мәкальләр илендә, моңлы һәм хисле иткән җырларыбыз хозурында булырга да өлгерделәр.

Һәр халыкның туган теле – аның тарихи көзгесе. Шуңа да телебез сафлыгын, матурлыгын без кечкенәдән үк сакларга, якларга өйрәнергә тиешбез.