Бүген иртәдән бирле мәктәбебез умарта күчедәй гөжләп торды. Чөнки бездә бүген бәйрәм – “Без бергә” республика балалар иҗаты фестивале конкурсының мәктәп туры: кемдер элгечләре белән күлмәк – костюмнарын күтәргән, кемдер аппаратура көйләү мәшәкатен үз өстенә алган, кемдер шыпырт кына җыр көйләп йөри, ә кайсыдыр бию элементларын күңеленнән барлый – беркем дә буш түгел, һәркем ни белән дә булса мәшгуль.

Менә, ниһаять, сәгать өчне сукты. Һәм укучыларны сәнгать дөньясы каршы алды. Әнә нинди сәләтлеләр бит алар: моңлы җыр сузу дисеңме, тыпыр – тыпыр биюме, күмәк номерларда катнашумы, алып бару осталыгын күрсәтүме – бар да була безнең укучыларыбыздан. Алардан да ныграк кайгырып утыручы сыйныф җитәкчеләренә дә зур рәхмәт. Ә иң кыены – жюри әгъзаларына, билгеле. Шулкадәр номерлар арасыннан иң – иңнәрен аерып алу бик җиңелләрдән түгел шул. Тик чыгыш ясаучыларның берсе дә якта калмады, билгеләп үтелде, номинацияләр билгеләнде.

Барлык катнашучыларга, оештыручыларга администрация исеменнән зур рәхмәтебезне белдерәбез. Алда – яңа үрләрдә - җиңүләр телибез!