Бүген мәктәбебездә укучыларга уку йорты сайлауда ярдәм итү, һөнәри юнәлеш бирү максатыннан 9 нчы класс укучылары һәм класс җитәкчесе Сәгыйрова Л.М. студентлар белән очрашу кичәсе оештырдылар. Әлеге кичәдә мәктәбебезне алдагы елларда тәмамлаган укучыларыбыз, 8 нче, 9 нчы класс укучылары, укытучылар, мәктәпнең уку-укыту эшләре буенча директор урынбасары Гыйниятуллина Р.Г. катнашты. Студентлар мәктәптән, әти-әнидән аерылып зур тормыш юлына аяк баскач нинди кыенлыклар белән очрашырга туры килүен, бу кыенлыкларны җиңәргә нәрсә ярдәм итүен, үзләре укый торган уку йортлары, гомумән,  студент тормышының иң күңелле чак булуы һәм башка бик күп төрле кызыклы вакыйгалар турында сөйләделәр. Укучы балалар үзләрен борчыган сорауларга җавапларын таптылар. Бу очрашу укучыларыбызга киләчәктә дөрес юл сайларга ярдәм итәр диеп ышанасы килә. Безнең чакыруны кабул итеп килгәнегез өчен рәхмәт сезгә. Киләчәктә дә шундый матур, зирәк, көләч йөзле булып калыгыз. Тормыш сынауларына бирешмәгез. Бәхетле булыгыз!