Декабрь аенда Чирмешән районы мәгариф бүлеге "Тере пластилин" дип исемләнгән конкурс игълан иткән иде. Бәйге 4 номинация буенча үтте. Туймәт төп белем мәктәбенең башлангыч сыйныф укучылары да конкурска берсеннән-берсе матур, эчтәлекле эшләнмәләр тәкъдим иттеләр. Шулар арасыннан иң яхшы дип табылган 4 укучының: Абдуллин Данияр, Әсәдуллина Румия, Бәдртдинов Рузил һәм Гатин Айнурларның кул эшләнмәләре муниципаль бәйгегә җибәрелде. Безнең өчен шатландырырлык нәтиҗәләр дә бар. 4 нче сыйныф укучысы Бәдртдинов Рузилнең "Яңа ел композициясе" исемле эше 1 нче урынга лаек булды.  Рузилне әлеге җиңүе белән котлыйбыз һәм бәйгедә катнашучы барлык укучыларга да киләчәктә уңышлар телибез.