Бүген бездә яшьлек үзе кунак –

Бу очрашу шуңа кадерле.

Бәхилләшмик, бары саубуллашыйк,

Аерылышып киткән чагында.

Туган мәктәп – туган нигез кебек,

Очраштырыр безне тагын да.

Әйләнәдә - гөлләр, тормыш якты,

Бәйрәм хисе бүген күңелдә.

     Туймәт төп гомуми белем мәктәбе 9 нчы сыйныф укучылары, 8 егет һәм кыз,  кулларына төп гомуми белем документы  алдылар. Мәктәп балаларга ныклы белем бирде, канат куеп үстерде. Ә бүген  хәер-фатихасын бирә.Укучыларыбызга  иң изге теләкләребезне юллыйбыз. Мәңгелек  әхлак нормалары бүген дә үз дәрәҗәсен югалтмаган. Бүген дә намус, вөҗдан, дуслык,тугрылык төшенчәләре үз көчендә.Укытучылар коллективы укучыларыбызга шуларга таянып яшәүләрен телибез. Бер- берегезгә авыр чакта иңегезне куегыз,шатлыкларны бергә бүлегез. Зур кайгы да күп кешегә бүлсәң кечерәеп кала. Кечкенә генә шатлык та күп кешегә тапкырлагач зур шатлыкка әйләнә. Тормышның кадерен белегез!

        Акыл камил, ә рух көчле булсын,
        Хәләл көч белән сез яшәгез.
        Гомер бит ул тик бер генә килә
        Җирдә яшеннәрдәй яшьнәгез.

        Җирне ямьләр өчен кирәк бит сез,
        Озын булсын барыр юлыгыз.
        Утка салыр дөнья, суларга да,
        Тик бәхетле генә булыгыз!
        Тик бәхетле генә булыгыз!