Яшь буынга сәламәт яшәү рәвеше алып баруны пропагандалау соңгы вакытта игътибар үзәгендә тора.  Район җитәкчелеге оештырган утырышларның берсендә бу тема кузгатылды һәм авыл җирлекләрендә, мәктәп базаларында яшүсмерләр өчен спорт секцияләре эшен активлаштыру кирәк икәнлеге ассызыкланды. Бу мәсьәләне район җитәкчесе Нурхамәт Нуруллович үз контроле астына алуын әйтте. 

Сәламәтлекне ныгытуның төрле юллары бар: чыныгу, иртәнге зарядка, дөрес туклану һәм физик күнегүләр. Физик яктан көчле һәм сәламәт булу бигрәк тә егетләр өчен кирәк, чөнки алар киләчәктә ватанны саклаучылар. Безнең мәктәп базасында да бу өлкәдә зур эш алып барыла. Ел барышына иртәнге зарядкалар, сәламәт яшәү рәвеше темасына кагылышлы ачык сыйныф сәгатьләре, дәресләр барышында физминутлар һәм башка күп төрле чаралар.  Апрель ае башыннан көрәш секциясе дә эшли башлады. Милли көрәш нечкәлекләрен өйрәнергә 18 егет теләк белдерде һәм авыл батыры Бәдертдинов Расих Вәҗи улы җитәкчелегендә аларның беренче дәресләре үтте.