“Әни – җирдә иң газиз, якын кеше. Ул сине тудырган, көйләп бишектә тирбәткән, синең беренче елмаюыңны, тәпи атлап китүеңне күреп шатланган, туган телен, халык моңнарын яратырга өйрәткән. Без үзебезнең тормышыбызны алардан башка күз алдына да китерә алмыйбыз. Алар – безнең дөньябызның яме. Бәйрәмнәр күп булса да, Әниләр көне безнең өчен аеруча күңелле һәм әһәмиятле. Чөнки әниләр өчен иң зур бүләк-балаларның игътибары, яратуы, хөрмәте бит. Бүген без сезгә иң җылы теләкләребезне җиткерергә уйлыйбыз һәм балаларыгыз аны шигырь телендә сөйләп бирергә телиләр”, -  дип башладык бәйрәмебезне. Кечкенә булсалар да нәниләребез бик тырышып шигырләр дә сөйләделәр, җыр да җырладылар, биеп тә күрсәттеләр hәм үз куллары белән әзерләгән бүләкләрен әниләренә тапшырдылар. Бәйрәмгә кунакка Тычкан да килде. Ул балаларга серле агачтан тылсымлы конфетлар бүләк итте. Бәйрәмебезнең икенче өлешендә әниләребез мәшәкатләрен онытып, бик теләп кызыклы уеннарда катнаштылар. Бәйрәм бик күңелле үтте.