07 май көнне Әтнә районында 2008 елгы һәм аннан яшьрәк егетләр арасында танылган тренер-көрәшче Сәфәров Рәдиф Разит улы истәлегенә багышланган «көрәш» буенча ачык турнир узды.

Турнир тантаналы рәвештә Азан укудан башланды. Сәламләү сүзе белән Әтнә муниципаль районы башкарма комитеты җитәкчесе Хисамиев Рөстәм Шаһит улы чыгыш ясады. Ул яшь буынны тәрбияләүдә, сәламәт яшәү рәвешен пропагандалауда һәм милли гореф-гадәтләрне саклауда мондый чараларның мөһимлеген ассызыклап катнашучыларга уңышлар теләде.

Быел турнир Арча, Әтнә, Биектау, Питрәч, Буа, Лаеш, Теләче районнарыннан, Казан шәһәреннән һәм Марий Эл Республикасыннан 117дән артык яшь көрәшчене җыйды. Катнашучылар югары дәрәҗәдә әзерлек, рухи көч һәм җиңүгә омтылыш күрсәттеләр.

Киеренке көрәш нәтиҗәләре буенча урыннар түбәндәгечә бүленде:

Команда зачетында 1 урынны Әтнә районы алды, 2 урынны Арча районы алды, 3 урынны Марий Эл-1  командасы алды.

Турнирны оештыручылар җиңүчеләрне генә түгел, үзенчәлекле сыйфатлар күрсәткән яшь спортчыларны да билгеләп үттеләр. «Иң яшь көрәшче» номинациясендә Световидов Степан, «Җиңүгә ихтыяр» бүләген Газимова Руфина, ә Афанасьев Арсений «Иң яхшы техник ыргыту» өчен бүләкләнде.

Спонсордан махсус призлар белән Мөхәммәтшин Ильяр һәм Мөхетдинов Әнгам бүләкләнделәр.

Турнирны оештыручылар барлык катнашучыларга, тренерларга, судьяларга һәм бу ярышның  иганәчесе  Хәзиев Камил Шамил улына зур  рәхмәтләрен белдерделәр.

Бүгенге көн җиңүчеләрнең һәм катнашучыларның шатлыклы йөзләрен, шулай ук спорт бәйрәме һәм бердәмлек атмосферасын чагылдырган истәлеккә гомуми фотографиягә төшү белән тәмамланды.