Олы Мәңгәр мәдәният йортында мәктәбебез укучылары игътибарына "Олы Мәңгәр тарихына сәяхәт" исеме астында бай эчтәлекле кичә булып узды. Кичәне мәдәният директоры Гөлсинә Шакирова алып барды. Үткәнен белмәгән халыкның киләчәге юк. Бай мираслы Олы Мәңгәр авылының борынгыдан алып бүгенге көнгәчә булган тарихын тыңлап утыру бер яктан күңелләрне тетрәндерсә, икенче яктан горурлык хисләре уятты. Әлеге кичәгә мөхтәрәм кунак, ветеран укытучы Илсур ага Шакиров та чакырылган иде. Ике томлык китап авторы, тарихчы , чын мәгънәсендә шәхесне йотлыгып тыңладык. Сәяхәтне оештыручыларга олы рәхмәтебезне белдерәбез. Киләчәктә дә очрашулар насыйп булсын.