21 октябрь көнне мәктәптә традицион "Уңыш бәйрәме" кичәләре узды. Бу бәйрәмгә әзерлекне алдан ук башладык. Мәктәп тирә-ягын чистарттык, ялгыз әбиләрнең өйләрендә булдык, булыштык. Төрле табигый материаллардан күргәзмәләр әзерләдек. Ташкабак - бакча каравылчысына, кишер - тычканга, кызыл чөгендер - Чипполинога әверелде. Һәрбер класс үз композициясен яклады.

    Башлангыч класслар бәйрәмне көзге матурлык, кошлар, чәчәкләрне өйрәнүгә багышлады. Алар матур шигырьләр, җырлар башкардылар, табышмакларга җавап бирделәр, бер-берсен сынадылар, ярыштылар. Бәйрәмгә нәни дусларын - балалр бакчасына йөргән балаларны да чакырганнар иде.

   5-7 класс укучыларын бәйрәмдә тылсымлы Көз кызы сәламләде. Укучылар үз осталыкларын Тылсымлы кызга күрсәттеләр: көз турында музыкага бию әзерләгәннәр, көз көне була торган кызыклы вакыйгаларны тасвирладылар, матур җырлар, шигырьләр башкардылар. 

   Бәйрәмнең иң күңелле өлеше кичке 5 тә башланды. Башка елдан аермалы буларак, бу бәйрәмне 8-9 класс укучылары оештырды. 8 класс укучылары өчен аеруча истәлекле көн булды - алар өлкән класс укучылары сафларына бастылар. Укучылар бәйрәмгә Яңа Кенәр лицеенда укучы 10-11 класс укучыларын да чакырганнар иде. Кунаклар да буш килмәгән - алар котлау сүзләре, матур җырлар бүләк итте.  

   Бәйрәмнең күрке - дискотека булды. Укучылар рәхәтләнеп биеделәр, күңел ачтылар.