Бүгенге көн дә бик матур чаралар белән башланып китте. Лагерьда - индеецлар көне. Балалар вожатыйлар белән бергә индеецлар булып киенделәр, бизәнделәр, төрле ярыш-конкурсларда актив катнаштылар. Индеецлар тормышы турында презентация карадылар. "Могҗизалар кыры" да бик күңелле үтте.

    Бүген лагерьда "Туган көн" бәйрәме узды. Балалар  матур-матур бүләкләр әзерләделәр, бер-берсенә бүләк иттеләр,  шигырьләр сөйләделәр, концерт куйдылар. Аннары  төрле-төрле ярышлар оештырылды,  балалар пионербол, саф һавада хәрәкәтле уеннар уйнадылар. Көн бик матур һәм файдалы үтте.

     12-нче июнь Россия көне. Шуk уңайдан без балалар  белән әңгәмәләр үткәрдек, Россия дәүләт символлары белән таныштык, эчтәлекле презентация карадык. Казаклар авылына барып чишмәләрне карадык, чистарттык, табигать гүзәллегенә сокланып кайттык. Ахырдан балалар бик матур бәйрәм концерты куйдылар. Көн бик матур һәм күңелле үтте.

       Бүгенге көн шундый тема астында үтте.  “Кызык – мызыклар дөньясы”на сәяхәткә чыктык. Әнә шундый көлкеле, мавыктыргыч минутларны фотоларда саклап калырга тырыштык.

Күзләребездә елмаю,

Йөзләрдә шатлык безнең.

Әнә шулай истә кала,

Матур мизгеле көннең!

        Лагерь балаларның шат көлүләреннән яңгырап тора, балалар лагерьга бик яратып йөриләр. Бүген - Геннис рекордлары көне – бигрәк тә үзенчәлекле булды.”Иң –иң”нәр ярышты. Саф һавада спорт ярышлары, күңелле уеннар үткәрелде.Иң оста балыкчыны билгеләдек.

       “Көлә белү – үзе бер талант”- дигән бер акыл иясе. Шуңа күрә бүген лагерьда көлке көне үткәрдек. “Иң оста мәзәкче”, “Кызыклы шигырь сөйләүче”осталары билгеләнде. Мимика һә м жест аша сөйләшү уены балаларга бигрәк тә ошады. 

       Сеҗе янгын сүндерү бүлекчәсе хезмәткәрләре яңадан тикшерү -  "эвакуация" үткәреп киттеләр.

Көлегез, көлегез,

Файдасы күп, белегез!

Дару, витамин ашамый,

Терелерсез, күрересез!

           Юл йөрү кагыйдәләрен көн саен кабатлап торабыз. Бүген менә "практик" дәресләр булды. "Иң оста велосипедчы", "Иң игътибарлы җәяүле"не билгеләдек.

“Нептун көне” бүген бездә,

Бәйрәм рухы күңелдә.

Кызык бәйгеләр үткәрдек,

Көн үткән сизелми дә.

      Бүген лагерьда “Нептун көне”. Нептун бабай үзе килде кунакка! Шешәдән су сиптереп, “диңгез патшалыгы”нда булган суүсемнәр, су астында яшәүче хайваннарны сурәтләдек. Искиткеч рәсемнәр килеп чыкты. Бәйге, тамашалар һәркемгә ошады.

            Г.Тукай әсәрләрен  балалар бик яраталар. Шагыйрь иҗаты буенча кызыклы мультфильмнар карау, викторина үткәрү, асфальтка әкиятләр буенча рәсем ясау бик отышлы булды.Звенолар үзара ярышты,  җитезлегебезне, кыюлыгыбызны да сынадык.  Бер генә кеше дә читтә калмады, һәркем үз командасы өчен очко китерергә тырышты. Соңгы нәтиҗә куанычлы: дуслык җиңде!

Көчлеләр без, кыюлар без!

Сынатмый беребез дә.

 Фотоларга күз салгач,

Күрәсез үзегез дә.