Бүген Курса Почмак урта мәктәбендә "Әфганстан - йөрәк ярасы..." дип исемләнгән кичә үткәрелде. Чара үз гомерләрен аямыйча, безнең киләчәгебез һәм азатлыгыбыз өчен көрәшкән егетләребезгә багышланган иде. Дүрт дистә елга якын вакыт үтсә дә, аларның йөрәкләрендәге авыр тойгыларны, алар күргән газапларны юып төшерү мөмкин түгел. Һичкайчан кулына мылтык та тотып карамаган яп-яшь егетләр яу кырына чыгып китә, сугыш мәһшәре эчендә кайный. Кичәгә коточкыч афәтне үз күзләре белән күргән авылдашыбыз Фасхиев Гали Шаһи улын чакырдык. Гали абый Әфганстанда булган вакыйгаларны яңартып, укучыларга җиткерде һәм укучыларны тырышып укырга, тәртипле, намуслы булырга, олыларга хөрмәт белән карарга, Ватанны яратырга, илгә тугры булырга өндәде. Дәһшәтле Әфган сугышы тәмамлануга күпме еллар үтүгә карамастан, аның күзләрендә яшь, моң-сагыш, шул елларның хәсрәте чагыла. Без, күкрәгенә орден-медальләр таккан авылдашыбыз Фасхиев Гали Шаһи улы белән чын күңелдән горурланабыз.