Бүген "Туган телем сагында" акциясе кысаларында 4 нче сыйныфта "Татар халык авыз иҗаты" исемле мәгълүмати минут үткәрелде.Укучылар халык авыз иҗатының жанрлары белән таныштылар. Алар әкиятләр сөйләделәр, табышмаклар чиштеләр, мәкаль һәм әйтемнәр әйтештеләр, бик матур итеп бишек җырларын башкардылар.
Халык авыз иҗаты әсәрләре әхлакый нормалар бик еш алышынып торган бүгенге җәмгыятьтә бик актуаль булып кала. Аларны укып, һәркем я гыйбрәт ала, я чын күңеленнән соклана. Барлык әсәрләр дә гади, балаларга аңлаешлы тел белән язылган. Шул ук вакытта аларда ниндидер серлелек тә бар. Ә серлелек балаларны һәрвакыт үзенә тарта. Шуңа күрә дә халык авыз иҗаты әсәрләре укучыларны үз дөньясына тарта, мавыктыра, балаларда халкыбызның борынгыдан килгән асыл сыйфатларын – тырышлык, эшчәнлек, хезмәт сөючәнлек, ярдәмчел булу, һәр эшне җиренә җиткереп эшләү кебек сыйфатларын тәрбияли. Әкиятләрнең, мәкаль-әйтемнәрнең, җырларның, легендаларның эчтәлеге балаларны табигать һәм тормыш-көнкүреш шартлары белән таныштыра, кечкенәдән үк бала характерында уңай сыйфатлар формалаштыру бурычын куеп, аларны төрле матур гадәтләргә, ата-аналарны һәм олыларны хөрмәт итү, гаделлек, намуслылык, батырлык, тыйнаклык һәм башка күркәм сыйфатларны булдыра. Халык авыз иҗаты әсәрләре батыр образлары, гүзәл кызлары белән яшь буында туган илебезгә, туган халкыбызга һәм туган телебезгә мәхәббәт тәрбияли; бердәм, тату булырга чакыра, горурлык хисләре уята.