Буыннар бәйләнеше, үткән тарихыбызны онытмау, киләчәк турында кайгырту, туган төбәккә, туган телгә мәхәббәт тәрбияләүдә, халкыбызның бай рухи мирасын, гореф-гадәтләрен киләчәк буыннарга җиткерүдә туган якны өйрәнү музейлары бик зур роль уйный. Музейларның сихри көче бар, алар тарихны саклыйлар һәм киләчәк буыннарга җиткерәләр. Музейдагы кечкенә генә экспонат та зур вакыйганы күзалларга ярдәм итә, әби-бабаларыбызның тарихын онытмаска булыша.

 13 нче февраль көнне 6 нчы сыйныф укучылары халкыбызның борынгы  йорт җиһазлары,эш кораллары белән танышу максаты белән мәктәбебез музеенда булдылар. Алар музейдагы йорт җиһазларының,эш коралларының  нәрсә өчен кулланылуы турында бик күп мәгълүмат алдылар.  Үз халкыбызның үткәнен, тарихын яшь буынга җиткерү – бик кирәкле эш. Балаларга патриотик тәрбия бирү, тарихка күз салу, күренекле шәхесләр белән горурлану хисләре тәрбияләүгә юнәлдерелгән әлеге музейның кыйммәте зур. Юкка гына «Үткәнеңне белмичә, киләчәккә юл юк» дип әйтмиләр бит.