Чишмә - табигать күрке. Элек-электән сусыз җиргә берәү дә килеп утырмаган. Торак урыннарны, шәһәрләрне, авылларны елга, күл, чишмә буйларына төзи торган булганнар. Чөнки – су яшәү чыганагы, сусыз тормыш юк. Борынгы кешеләр чишмә, кое, диңгез, елга, күл, буа, кебек су чыганакларына табынганнар. Аларны изге әйберләр дип исәпләгәннәр. "Чишмәне пычратма, кулыңны чуан басар”, – дигәннәр борынгылар. Чишмә – чисталык, сафлык, пакьлек билгесе. Туган як чишмәләрен карау, аларның чисталыгын саклау - безнең төп бурычыбыз.

       Бүген Иске Масра башлангыч сыйныф укучылары,  җитәкчеләре Фатыхова Э.И. һәм Хөснетдинова Г.Р. белән берлектә, Муллахмәт чишмәсен чистартырга бардылар. Алар чишмә янына каткан бозны чаптылар һәм карын көрәделәр. Укучыларның чишмәләргә карата уңай карашта булулары сөендерә.