Хөрмәтле коллегабыз  Айнур Василович! Сезне улыгыз туу белән котлыйбыз!  Сезнең гаилә бүген тагын да тулыланды, баеды.  Сез чиксез бәхетле, сезнең шушы бәхетегезгә карап без дә куанабыз.  Сабыйның бу дөньяга бәхетле булыр өчен, кешеләргә үрнәк булырдай, акыллы-тәүфыйклы, чын кеше булыр өчен туганлыгына ышанабыз.  Аның сәламәт, акыллы, максатчан, рәхимле, иманлы бала булып үсүен телибез.

      Көтеп алган җәйге каникулыбызда бетеп килә. Яңа уку елы башланырга да аз вакыт калып бара. Һәр мәктәп укучыларын каршы алырга әзерләнә. Бакчаны, территорияне тәртипкә китерә, мәктәп әчендә дә күп кенә эшләр эшләнә - юабыз, җыештырабыз, буйыйбыз, ремонтлыйбыз. Бу эшләрне инде башкарып чыктык диярлек, бары тик сагынып, елмаюлы йөзләребез белән 1 нче сентябрьне көтеп, укучыларыбызны гына каршы аласы калды. Бу уку елыбызда тыныч булыр, укучыларыбыз, укытучыларыбыз да исән- сау булырлар, тырышып укырлар, имтиханнарны яхшы гына тапшырырлар дип  өметләнеп белем көнен генә көтәсе кала.

    В школах идет подготовка к новому учебному году. 27 июля в нашей школе побывала комиссия и проверила готовность нашей школы к новому учебному году. Педагогические и технические работники приложили немного усилий, чтоб школа выглядела достойно. И комиссия отметила хорошую подготовку школы.

Исемем  сәер булса да 

Мине бик хөрмәтлиләр.
Киселсә дә, канаса да
Иң әйбәт дару диләр. (бака яфрагы)

Әйе, җәйге чор дару үләннәре җыяр өчен иң кулай вакыт, кайсы чәчәк ата, кайсы җимеш бирә. Укучылар да каникулда тик ятмыйлар - дару үләннәре җыялар. Бу бер дә җиңел эш түгел, чөнки иң беренче чиратта дару уләнен агулы үләннән аера белергә кирәк, ә икенчедән инде җыю вакыты, чөнки һәр үләннең билгеле бер вакытта гына дару икәнен, ә җыярга соңга калсаң инде агуга әйләнүен барыбыз да беләбез.Шушы кагыйдәләрне күздә тотып һәр класста үзенә бүлеп бирелгән үләнне вакытында һәм тиешле күләмдә җыеп тапшырыр дип көтеп калабыз . Җыю кагыйдәләре:

•        дару үләннәрен юл буйларыннан җыярга ярамый;

•        дару үләннәрен кирәк булган очракта гына җыярга;

•        югалып баручы үсемлекләрне җыю тыела;

•        дәвалау үзлекләрен үзең белмәгән очракта җыярга ярамый;

•        җыйган үләннәрне караңгы, җиләс урында киптерергә кирәк

       Каникул булуга карамастан тик ятмыйбыз. Мәктәптә эш кайный, приемкага әзерләнәбез, үзебезгә кышка витаминнар әзерлибез, кыяр-помидор тозлыйбыз, варенье ясыйбыз.Җәебез күңелле үтә, күңелле ял да итәбез, эшли дә беләбез.

      Мәктәп яны тәҗрибә участогында укучылар гына түгел, график буенча укытучылар да килеп, бакчаны тәртипкә китереп, рәхәтләнеп эшләп кайтып китәләр. Табигатькә сокланып бакчага су сибү, печән чабу, чүп утау, яшелчәләр җыеп, тозлау, виктория, карлыганнан варенье кайнату , компот ябу - хәзерге вакытта шундый эшләр башкарыла. Үзебез өчен тырышабыз бит, чит кеше өчен түгел. Килгәндә - чәчәкләргә күмелеп утырган ишегалдына керү -  үзе бер рәхәтлек бирә, ә инде тозлаган яшелчәләребез, кайнаткан варенье, компотларыбызны эчеп кыш чыгу үзе бер күңелле.

    16 нчы июль көнне Арча стадионында Балачак бәйрәме үтте. Бу бәйрәмдә районның барлык балалары да рәхәтләнеп ял итеп, төрле ярыш - конкурсларда катнашып, үзен төрле яктан күрсәтә ала иде. Шулай ук мәктәбебездән дә укучылар бу бәйрәмдә катнаштылар, көрәшеп, үзләренең көчләрен дә сынап карадылар, җиңүләр яуламасалар да, төшеп тә калмадылар, үзләрен күрсәтә белделәр. Бәйрәм чыннан да бик күңелле узды. Фестивальне тантаналы рәвештә Арча муниципаль район башлыгы Нуриев И.Г. үзенең котлавы белән ачып җибәрде. Аннан соң бәйрәм флагын күтәрделәр. Бәйрәм балаларның һәм аерым башкаручыларның чыгышларына үрелеп барды. Укучылар үзләрен - теннис, җиңел атлетика,стритбол, пляж волейболы,петанк, бочче, мәктәпкәчә яшьтәге балалар  - самокат ярышы,ГТО нормалары тапшыру, күңелле стартлар һәм башка спорт төрләре буенча көчләрен сынап карый алдылар. Ә 18 яшьтәге балалар көрәштә катнашып, бүләкләр дә оттылар.  Шулай ук бәйрәм дә халык уеннары да оештырылды, алар : чүлмәк вату, капчык киеп йөгерү, кашыкка йомырка куеп йөгерү, күзләрне бәйләп бүләкләр кисеп алу,бүрәнәдә капчык белән “сугышу”, сулы чиләктән алма алу,”чаңгыда йөрү”, ласт киеп йөгерү һ.б. Көн дә җылы, матур булды, балалар да рәхәтләнеп ял иттеләр.

      Каникул булуга карамастан укучылар тик ятмыйлар, мәктәп яны тәҗрибә участогында эшләп- ял итәләр. Яшелчәләргә су сибәләр, чүп утыйлар, карлыган җыялар, тутәлләрне йомшарталар, помидор - кыяр уңышын җыялар. Үзләренә кышка витаминнар туплыйлар, күңелле дә, кирәкле дә эш. Сыйныфташлары белән очрашалр һәм инде кыш чыгарга җитәрлек витаминнар туплыйлар, ә башлангыч сыйныф укучылары - эшкә өйрәнә. Менә шулай итеп җәйге ялны файдалы да, күңелле дә итеп үткәрәбез без.

   Җылы, матур көнне коллектив белән җыелып , "Ак Барс" Агрофирмасы хайваннары өчен яфраказык җыярга чыктык. Хайваннарга да кышка витамин кирәк бит. "Арбаңны кыштан, ә чанаңны җәйдән үк әзерләп куй" – ди татар халкы. Шушы мәкальне истә тотып, Сеҗе авыл җирлекләрендә яшәп, бюджет тармагында эшләүчеләр витаминнарга бай булган терлек азыгы җыюда зур активлык күрсәттеләр. Бу мөһим эшкә һәркем бик җаваплы карады. Витаминнарга бай, сыйфатлы яфраказыкның кыш көне терлекләр өчен файдасы зур булачак.

       Хезмәттәшебез Зөлфия Мидхәт кызын 50 яшьлек юбилее белән чын күңелдән котлыйбыз.Сезгә озын гомер, бәхет-шатлыклар, җан тынычлыгы, тән сихәте, саулык-сәламәтлек телибез. Кайгы-хәсрәткә бирешми, яр­дәмчел, изге күңелле, балаларыңның  игелеген күреп, озак яшәргә насыйп булсын. Рәхмәтләргә һәм рәхәтләргә төренеп яшәгез.

Тормыш юлың һәрчак балкып торсын,
Ягымлы, шат булсын күңелең.
Озын гомер, бәхет-шатлык белән
Бер кайгысыз үтсен гомерең.
Зур бәхетләр юлдаш булсын сиңа,
Көннәреңне шатлык бизәсен.
Сәламәтлек — ярты бәхет, диләр,
Шушы бәхет читләп үтмәсен!