2019 елның 30 нчы октябрендә Г.Тукай исемендәге Арча педагогия көллиятендә “Әлифба” музееның 20 еллыгына һәм “Әлифба” дәреслеге авторлары С.Г. Вагыйзов һәм Р.Г. Вәлитова истәлегенә багышланган “Музей педагогикасы һәм әлифбасы: тарихка сәяхәт һәм заманча үсеш тенденцияләре” Республикакүләм фәнни-гамәли конференция уздырылды.

Конференциядә 246 кеше катнашты. Алар арасында ТРМҮИның татар теле һәм әдәбияты кафердасы, Халыкара бәйләнешләр институты галимнәре, ТР Фәннәр Академиясенең Ш. Мәрҗани исемендәге Тарих институты хемәткәрләре, Татарстан Республикасының урта һөнәри белем бирү уку йортлары, Арча муниципаль районы мәктәпләре укытучылары, мәктәпкәчә белем бирү оешмалары тәрбиячеләре, музей хезмәткәрләре, язучылар, көллиятебез студентлары бар иде.

Конференция Арча педагогия көллияте директоры Мусина Лилия Надыр кызы сәламләве белән башланып китте. Пленар утырышта килгән кунакларның чыгышлары тыңланылды. Алга таба эш 5 секциягә бүленеп дәвам итте. Әлеге секцияләрдә студентлар һәм укытучылар үзләренең фәнни тикшеренү эшләрен тәкъдим иттеләр, файдалы һәм кызыклы мәгълүматлар белән уртаклаштылар.

Конференция кысаларында «Язучы дәрес бирә» Республикакүләм белем бирү проекты узды. Төрле елларда Арча педагогия училищесын тәмамлаган шагыйрәләр Сания Әхмәтҗанова, Рифә Рахман “Әлифба язмышына бүгенге буын иҗатчылар карашы. Заманча проектлар” дигән темага эчтәлекле, мавыктыргыч дәресләр бирделәр. Бу дәресләрдән студентлар да, укытучылар да, дәрес биргән язучылар үзләре дә зур канәгатьләнү хисләре белән чыктылар.

Конференция материаллары тупланып, җыентык әзерләнде.