2019 елның 20 нче сентябрендә   бөтен гомерен нефть-газ үткәргечләр төзүгә багышлаган шәхес, Социалистик Хезмәт Герое, 1952-54 елларда Арча педагогия училищесында укыган якташыбыз  Шәйхетдинов Илсур Гарәфи улының “Гомерем мизгелләре” китабын тәкъдир итү кичәсе үткәрелде.

Бу кичәгә Илсур аганың дуслары, якыннары нефть-газ үткәргечләр төзү юнәлешендә  эшләгән хезмәттәшләре килде.

Кичәдә Илсур аганың тормыш һәм данлы хезмәт юлы яктыртылды. Хезмәт юлларын аның җитәкчелегендә башлап җибәргән хезмәттәшләре Татнефтепроводстрой тресты генераль директоры Пелишкин Александр Геннадьевич,  Шәмәрдән эшчеләр бистәсендәге газ куу компрессор заводы директоры Нурисламов Ришат Иксанович, Геройлар җәмгыяте рәисе Хайруллин Газинур Масхутович, авылдашы Мөхәммәдиев Ядкарь Зөфәрович Илсур Шәйхетдинов турындагы җылы истәлекләре белән уртаклашты.

Кичәне студентлар башкаруында Илсур ага белән Дания апа яраткан җырлар, шигырьләр бизәде.

Бу көн – Илсур ага, аның якыннары, дуслары һәм хезмәттәшләре өчен истәлекләр яңарту кичәсе, ә көллият студентлары өчен, вакыт машинасында 60-90 еллар тарихына кайту һәм шул чорда нефть-газ үткәрү өлкәсендә хезмәт куючыларның катлаулы хезмәт юлын өйрәнү көне буларак истә калыр дип ышанабыз.