30 ноябрь көнне Г.Тукай исемендәге Арча педагогия көллиятендә «Мәгарифне яңарту шартларында социомәдәни компетенция формалаштыру» Республикакүләм фәнни-гамәли конференция узды. Конференциядә ТРМҮИның татар теле һәм әдәбияты кафердасы хезмәткәрләре, Татарстан Республикасының урта һөнәри белем бирү уку йортларыннан татар теле һәм әдәбияты укытучылары, Арча муниципаль районы мәктәпләренең татар теле һәм әдәбият укытучылары, язучылар, көллиятебез студентлары катнашты.

Конференциянең пленар утырыш өлеше көллиятебез директоры Гарипова Гөлнара Фидаил кызы сәламләве белән башланып китте. Килгән кунаклар докладлары тыңланды. Пленар утырыштан соң эш 3 мәйданчыкта дәвам итте.

Конференция кысаларында «Язучы дәрес бирә» Республикакүләм белем бирү проекты узды. Анда Гүзәл Әдһәм, Эльмира Шәрифуллина, Айгөл Әхмәтгалиева катнашты.

Арча муниципаль районы мәктәпләреннән килгән татар теле һәм әдәбияты укытучылары, көллиятебезнең татар теле һәм әдәбияты укытучылары осталык дәресләре күрсәттеләр.

Әлеге чаралардан соң көллиятебезнең актлар залында конференция кысаларында урта һөнәри белем бирүче уку йортлары арасында үткән татар теленә өйрәтү өчен методик әсбаплар конкурсына йомгак ясалды, җиңүчеләргә дипломнар, сертификатлар тапшырылды.

Конференция материаллары китап итеп басылып чыкты.