Көллиятебезнең генә түгел, районыбыз горурлыгы булган музеебызда «Буыннар галимне хөрмәтли» дип исемләнгән чаралар узды. 24 нче октябрь көнне дә Арча педагогия көллиятендә очрашу-кичә үткәрелде. Әлеге кичә Сәләй Вагыйзовның тууына 110 ел уңаеннан «Әлифба» музеенда оештырылды. Очрашуда Сәләй аганың якташлары – Самара өлкәсеннән килгән кунаклар, укучылары, улы Камил, коллегалары, «Ватаным Татарстан» газетасы журналисты, баш редактор урынбасары Фәния Әхмәтҗанова, көллиятебез студентлары да катнашты.

Әлеге очрашу гимназия сыйныфы укучылары башкаруында «Белем алиһәсе – «Әлифба» дип исемләнгән шигырьләр тезмәсе тыңлаудан башланып китте. Кичә барышында язучы Гүзәл Әдһәмнең «Меңнәрнең берсе» әсәреннән бик күп өзекләр тыңланды. Бу өзекләргә салынган Сәләй ага һәм Рәмзия апаның тетрәндергеч язмышы, татар халык моңнары кунакларның куңел кылларын тибрәтте.

Килгән кунаклар Сәләй ага турында якты истәлекләре белән уртаклаштылар, үткәннәрне хәтерләрендә яңартып, хөрмәткә лаек затларны янә бер кат искә алдылар.