Нәүрүз – кар беткәнче үк елмаеп балкып, кышкы йокыдан соң җиһанда тереклек башлануын хәбәр итүче язның тәүге чәчкәсе. 19 гасырга кадәр әби-бабаларыбыз 21 март, көн белән төн тигезләшкән көнне Яңа  елны каршы алганнар. Ә бәйрәмнең хуҗасы – яшьлек, сафлык иясе сылу кыз – Нәүрүзбикә һәм ул җиргә яз алып килә дигән ышану булган.

Борынгы йолаларны яңарту, киләчәк буынга тапшыру ниятеннән Г.Тукай исемендәге Арча педагогия көллиятебездә эшләп килүче “Татар халык җәүһәрләре” түгәрәге зур тырышлык куя. Студентларның сәләтен барлау, татар халкының милли йолалары белән таныштыру максатыннан, ел да Нәүрүз бәйрәмне үткәрү гадәте яши биредә.

Нәүрүз бәйрәмендә егетләр, кызлар үзебезнең милләтебезнең элек-электән килгэн асыл сыйфатларын саклаган, шул ук вакытта заманнан да артта калмаган, талантлы, тапкыр, җитез булуларын исбатладылар. Татар халкының җырлы-биюле, әйлән-бәйлән уеннарында катнашып, халык мәкальләре, әйтемнәр, табышмаклар әйтешеп, ярыш формасында узган татар халкының уеннарында көчләрен җитезлекләрен сынадылар.

Бәйрәм - начар уйлар, борчулар янып юкка чыксын, дигән ышану белән, карачкы яндыру күренеше белән тәмамланды.

Әлеге бәйрәм безнең көллиятебездә көтеп алынган, зурлап уздырыла торган бәйрәмнәребезнең берсе. Быел да аның рухы һәркем күңеленә кереп, күтәренке кәеф, шатлыклы мизгелләр бүләк итте.