2017 нче елның 10 нчы ноябрендә Габдулла Тукай исемендәге Арча педагогия көллияте базасында 3 нче тапкыр “Язучы дәрес бирә” республикакүләм белем бирү проекты тормышка ашырылды. Әлеге белем бирү проекты студентлар, укучылар һәм татар теле һәм әдәбияты укытучылары өчен массакүләм чара булып тора. Аның төп максаты: яшь буынның әдәбиятка һәм укуга карата игътибарын арттыру, матур әдәбият белән кызыксынуны үстерү. Бурычлары: укучыларны һәм укытучыларны Татарстан республикасының язучылар элитасы белән таныштыру; татар әдәбияты дәресләрендә әдәби әсәр белән оригиналь эш формасын оештыру;
татар телен саклау һәм камилләштерү, укучыларның иҗади фикерләү һәм сәләтләрен үстерү өчен шартлар тудыру; хәзерге заман татар әдәбиятының актуальлеге турында язучы белән диалог төзү.
Белем бирү проекты өч өлештән торды:
7-9 нчы сыйныфлар, 1 нче курс студентлары өчен язучы белән ачык дәрес;
Язучылар белән пресс-конференция;
язучылар, татар теле һәм әдәбияты укытучылары белән түгәрәк өстәл.
Проектта 7- 9 гимназия сыйныфлары, 1 нче курс студентлары, республиканың һөнәри белем бирү оешмаларыннан (Г. Тукай исемендәге Әтнә авыл хуҗалыгы техникумы, Казан педагогия көллияте, Чистай авыл хуҗалыгы техникумы, Казан шәһәре Халыкара хезмәт күрсәтү көллияте, Кукмара аграр көллияте, Норлат аграр көллияте) килгән татар теле һәм әдәбияты укытучылары катнашты.
Быел “Әдәбият – тел, мәдәният сакчысы” дигән темага күренекле татар шагыйрьләре Нәҗибә Сафина, Мөхәммәт Мирза, Рифат Сәлахов, Сания Әхмәтҗанова, Илсөяр Иксанова, Йолдыз Шәрәпова танылган җырчысы, Татарстан Республикасының халык артисты Миңгол Галиев дәрес бирде. Дәресләр студентлар, укучылар күңелендә кызыксыну уятты, дәресләрдән соң үткәрелгән пресс-конференция катнашучыларга үзләре кызыксынган сорауларга җавап табу мөмкинлеге тудырды.