2016 нчы елның 28 сентябрендә Г. Тукай исемендәге Арча педагогия көллиятендә икенче тапкыр республикакүләм “Язучы дәрес бирә” белем бирү проекты тормышка ашырылды. Проектта Татарстан Республикасы Язучылар берлеге әгъзалары: Хәнәфи Бәдигый, Гүзәл Әдһәм, Йолдыз Шәрәпова, Җәмилә Әхтәмова, Рифат Сәлах, Халисә Ширмән, Нәҗибә Сафина, Рифә Рахман, Шәмсия Җиһангирова, Фәнил Гыйләҗев, Арча, Балтач, Кукмара, Биектау, Саба, Питрәч районнарыннан килгән башлангыч класслар, татар теле һәм әдәбияты укытучылары, 1 – 2 курс студентлары, гимназия сыйныфлары укучылары катнашты. “Әдәбиятта - Укытучы образы” дигән темага каләм ияләре үткәргән дәресләр белем бирү ягыннан да, тәрбия ягыннан да, студентларны, гимназия сыйныфы укучыларын укытучы һөнәренә әзерләү ягыннан да зур әһәмияткә ия. Чара көллиятнең актлар залында студентлар тарафыннан әзерләнгән әдәби-музыкаль композиция һәм язучыларның ялкынлы чыгышлары белән тәмамланды. Проект куйган максатларга иреште.