Гаиләләр белән элемтәне ныгыту, балаларда үз милләтенә, аның теленә, гаиләсенә, иленә ихтирамлы мөнәсәбәт булдыру, горурлык хисе тәрбияләү, гаилә – балалар бакчасы  арасындагы дәвамчанлык өзелмәве өстендә эшне дәвам итү максаты белән, 11нче апрель көнне 54 нче “Аксылу” балалар бакчасында “Мин бәхетле гаиләм белән” исемле конкурс үтте. Әти-әниләр  дөнья мәшәкатьләрен беразга онытып, күңел ачтылар ул көнне. Бәйрәм әтиләр, әниләр һәм балалар катнашында биюләр, ярышлар, табышмаклар, мәкальләр әйтешү, "Көзге" уеннары белән үрелеп барды. Һәр гаилә үзләренең әби-бабайларыннан калган, истәлек булып  сакланып килгән кадерле әйберләре белән таныштырдылар. Татар халык бәйрәмнәрен искә төшерделәр. Әлбәттә инде бәйрәм табынсыз булмый! Әниләр үзләренең татар халык ашларын пешерүдә дә осталыкларын күрсәттеләр. Соңыннан бергәләшеп үзләре алып килгән күчтәнәчләр белән чәй эчтеләр. Бәйрәм бик күңелле, җанлы үтте.  Әти-әниләр дә, балалар да күтәренке күңел белән өйләренә таралыштылар.

     Шушы тату,бердәм, актив гаиләләрдә тәрбияләнүче балалар да тыйнак, эшкә уңган, тәрбияле булып үсәрләр дип ышанасы килә.