19.10.2019 Алексеевск районында “Татарча диктант Яз” акциясе 12 мәктәптә оештырылды. Чарада татар теленә битараф булмаган мәктәп укучылары, укытучылар, китапханәчеләр, социаль хезмәткәрләр, тәрбиячеләр, пешекчеләр – 350гә якын кеше катнашты. Диктантны тыныч кына, зур кызыксыну, яхшы кәеф белән яздылар. Иң яшь катнашучыга-ун яшь булса, иң карт катнашучыга 67 яшь иде. Диктант язганда авыр моментлар булмады, ләкин олы яшьтәгеләр диктант текстының озын булуын әйттеләр. Мәктәптә элек эшләп, лаеклы ялга киткән укытучыларның чарага килүе бик күркәм булды. Кайбер мәктәпләрдә чараны “Туган тел”не җырлап башладылар.
   Мәктәпләрдә бу чараны оештыручылар икенче елга диктант язуны бәйрәмчәрәк итеп, чәй эчүләр белән оештырсак, тагын да күбрәк кеше килер дип нәтиҗә ясадылар.
   Авыл китапханәчесе Нургатина Дилә акциядә катнашуына бик шат икәнлеген белдерде. Текстның да бик уңышлы сайланганына басым ясады. Алдагы елларда да катнашачагын белдерде.
   Социаль хезмәткәр Гайнуллина Аида шулай ук бу акция турында ишетүгә, катнашырга кирәк дип алдан ук планлаштырып куйган. Мәктәп елларынннан бирле диктант язганы булмаган. “Шулай да бик начар язмаганмындыр әле дип әйтә алам”, - диде ул. Киләсе елга таныш-белешләремне дә алып киләчәкмен дип вәгъдә итте.
   Татьяна Вячеславовна: “Татар телен укымаганга 7 ел үтте, күп нәрсә онытылган, ләкин язган вакытта кайбер кагыйдәләр искә төшә” – ди.