2019 ел 16 нчы май көнне Г. Боровиков исемендәге 3 нче Алексеевск урта мәктәбендә язучы, шагыйрә, журналист, Саҗидә Сөләйманова исемендәге премия лауреаты, "Казан утлары" журналы редакциясенең шигърият бүлеге мөхәррире Фирүзә Җамалетдинова һәм журналист, Татарстан Республикасының атказанган матбугат һәм массакүләм коммуникацияләр хезмәткәре, Татарстан журналистлар берлеге әгъзасы,Татаринформ мәгълүмат агентлыгы хезмәткәре Шәйхетдинова Надия Вазыйх кызы белән очрашу булып узды. Очрашу “Гомерем тукталышлары” дип аталды. Очрашуда Алексеевск мәктәбе укучылары, татар теле һәм әдәбияты укытучылары, авыл китапханәчеләре катнашты. Очрашуны Алексеевск муниципаль районы мәгариф бүлеге җитәкчесе Дамир Гыйләҗев ачып җибәрде, очрашуда катнашучыларга теләкләрен җиткерде һәм Ф. Җамалетдинова шигырен укып үтте. Очрашуны Г. Боровиков исемендәге 3 нче Алексеевск урта мәктәбе укытучысы Роза Кутуева укучыларнын, укытучыларның чыгышлары белән бәйләп алып барды. Әсәрләрдә күтәрелгән проблемалар буенча язучы үз фикерен җиткерде. Китапханәчеләрнең , кичәдә катнашучыларның язучы иҗатына бәяләре, фикерләре янгырады, кызыксындырган сорауларга җаваплар бирелде. Очрашу эчтәлекле, кызыклы, кирәкле булды.